दुबई । यूएईमा बसोबास गर्ने नेपाली समुदायको सक्रियतामा ‘हिल टप माउन्टेन लमजुङ ७ ए साइड फुटबल प्रतियोगिता–२०२६’ आयोजना हुने भएको छ। प्रतियोगिता ३१ जनवरी २०२६ का दिन दुबई इन्भेष्टमेन्ट पार्कस्थित ग्राउण्ड नम्बर ४ मा हुनेछ।
लमजुङ एफसी यूएईको आयोजनामा हुन लागेको उक्त प्रतियोगितामा ३० वटा समूहको सहभागिता रहने आयोजकले जनाएको छ। “Seven players, one pitch, endless passion” भन्ने नारासहित सञ्चालन हुने प्रतियोगितामा यूएईका विभिन्न नेपाली क्लब तथा संघसंस्थाका टोलीहरूले प्रतिस्पर्धा गर्नेछन्।
प्रतियोगिताका विजेतालाई ४ हजार ४ सय ४४ दिराम, उपविजेतालाई २ हजार २ सय २२ दिराम तथा तेस्रो स्थान हासिल गर्ने टोलीलाई १ हजार १ सय ११ दिराम नगद पुरस्कार प्रदान गरिनेछ। साथै खेल अवधिभर उत्कृष्ट अनुशासन र खेलभावना प्रदर्शन गर्ने टोलीलाई फेयर प्ले ट्रफी समेत प्रदान गरिने आयोजकले जानकारी दिएको छ।
खेल तालिका अनुसार प्रतियोगिता बिहानदेखि साँझसम्म चरणबद्ध रूपमा सञ्चालन हुनेछ। आयोजकले प्रतियोगिताले नेपाली समुदायबीच आपसी सद्भाव, भाइचारा र खेलकुद संस्कृतिको प्रवर्द्धन गर्ने विश्वास व्यक्त गरेको छ।
प्रतियोगितामा हिल टप माउन्टेन रेष्टुरेन्ट ब्रान्ड स्पोन्सरका रूपमा रहेको छ भने अन्य विभिन्न संघसंस्था तथा व्यवसायिक प्रतिष्ठानहरूको समेत सहयोग रहेको छ।
नेपाली समुदायको उल्लेख्य उपस्थितिमा हुने अपेक्षा गरिएको यस प्रतियोगिताले यूएईमा नेपाली फुटबलप्रेमीहरूलाई एकै थलोमा जोड्ने विश्वास लिइएको छ।
