काठमाडौं । अमेरिका र इरानबीच तनाव बढ्दै गएपछि परराष्ट्र मन्त्रालयले ‘ट्राभल एड्भाइजरी’ जारी गरेर इरानमा रहेका नेपालीलाई तत्काल सुरक्षित स्थानमा जान भनेको छ । साथै इरान जाने तयारीमा रहेकाहरुलाई पनि यात्रा स्थगित गर्न भनेको छ ।
यसै सन्दर्भमा परराष्ट्र मन्त्रालयका प्रवक्ता लोकबहादुर पौडेल क्षेत्रीसँग गरिएको कुराकानी।
इरान र अमेरिकाबीच तनाव बढिरहेका बेला नेपाल सरकारले ट्राभल एडभाइजरी जारी गरेर इरान छाड्न भन्यो । इरानको पछिल्लो अवस्थाबारे तपाईंहरुको विश्लेषण के हो ?
इरानमा तनावको अवस्था छ कि छैन भन्ने भन्दा पनि हामीले हाम्रो नागरिकको सुरक्षालाई मध्यनजर राखेर ट्राभल एडभाइजरी जारी गरेका हौं, त्यहाँको कुनै सूचना प्राप्त गरेको हिसाबले होइन ।
अलिकति सुरक्षात्मक उपाय अनुसार हामीले ट्राभल एडभाइजरी जारी गरेका हौं । त्यहाँ के हुन्छ, कसो हुन्छ भन्दा पनि आफ्ना नागरिकहरु सुरक्षित होउन् भन्ने राष्ट्रको दायित्वको हिसाबले एडभाइजरी जारी गरेर सुरक्षित हुनुस् भन्ने हो । त्यहाँ रहेका नेपालीहरुको सुरक्षा नै सबैभन्दा ठूलो विषय भयो ।
इरानमा कति छन् नेपाली ? हाल उनीहरुको अवस्था कस्तो छ ?
हाम्रो जानकारीमा इरानमा १० जना नेपालीहरु हुनुहुन्छ । अहिलेसम्म सबै सकुशल हुनुहुन्छ । उहाँहरु सबै हाम्रो सम्पर्कमा हुनुहुन्छ । उहाँहरु दशैजना एकअर्कामा जोडिनु पनि भएको छ ।
हामीले ट्राभल एडभाइजरी जारी गरेर सम्भव भएसम्म सुरक्षित स्थानमा लाग्नुस् भनेका छौं । यो भन्दैमा फेरि असुरक्षित तरिकाले हिँड्न पनि भएन ।
तपाईंहरुको यो कुरामा इरानमा रहेका नेपालीहरु के भन्नुहुन्छ ?
उहाँहरुले हामी अहिलेसम्म सुरक्षित नै छौं, सरकारले जारी गरेको सूचना, एडभाइजरी फलो गर्छौं र हामी हाम्रो व्यवस्थापन गर्दैछौं भन्नुभएको छ ।
उहाँहरु वैध हो कि अवैध तरिकाले जानु भएको हो ? अहिले इरानको कुन ठाउँमा हुनुहुन्छ ?
उहाँहरु लिगल्ली (वैध) तरिकाले नै बसिरहनु भएको छ । इरानको अन्त होइन, तेहरानमै हुनुहुन्छ । अघिल्लो पटकको लडाइँ हुँदा केही नेपालीहरु जेलमा पनि हुनुहुन्थ्यो । अहिले चाहिँ त्यस्तो छैन ।
उहाँहरु केको सिलसिलामा इरान जानु भएको हो ? महिला-बालबालिकाहरु पनि छन् कि ?
उहाँहरु कामको सिलसिलामा जानु भएको हो । उहाँहरुमध्ये एक फेमिलीसहित पनि हुनुहुन्छ । अरु चाहिँ इन्डिभिजुअली हुनुहुन्छ ।
उहाँहरु सुरक्षित ठाउँमा जाने भनेको कहाँ हो ? कसले समन्वय गर्छ ?
खासगरी कतारमा रहेको हाम्रो नेपाली दूतावासले नै इरान पनि हेर्छ । त्यसैले नजिक, सरल, सहज जता पहुँच छ त्यता जानुहुन्छ । हवाई सम्पर्कको हिसाबले वा जलमार्गको हिसाबले मध्यपुर्वको अरबनै नजिक हुन्छ ।
तपाईंहरुले इरान नजान पनि सल्लाह दिनु भएको छ । यताबाट त्यता जाने तयारीमा पनि कोही हुनुहुन्थ्यो ?
त्यो त स्पष्ट जानकारी भएन । अध्यागमन कानुन नियमहरु थोरै परिवर्तित छन् । अग्रिम जानकारी गराउने सिस्टम पनि छैन । तर पनि हामीले कोही जाँदै हुनुहुन्छ भने नजानु होला भनेर केही हप्ता अगाडि नै जानकारी गराइसकेका थियौं । यसपालि जान लागेको विषयमा हामीलाई त्यस्तो जानकारी त छैन तर कोही जान लागेको अवस्था हो भने यात्रा स्थगित गर्न सल्लाह दिन्छौं । – अनलाइन खबर
