दुबई, – अन्तर्राष्ट्रिय श्रमिक दिवसको अवसर पारेर नेपाली समाज यूएईले समाजमा आबद्द जिल्ला समाज तथा नेपाली दूतावाससँगको सहकार्यमा बृहत् संवाद कार्यक्रम आयोजना गर्ने भएको छ। ‘श्रमिक सचेतना तथा सुरक्षित आप्रवासन सम्बन्धि बृहत् संवाद कार्यक्रम’ भोली आईतवार दुबईस्थित ब्लु प्यालेस होटल, बरदुबईमा गर्न लागिएको हो ।
कार्यक्रममा यूएईमा कार्यरत नेपाली समुदायबीच श्रमिक अधिकार, आप्रवासन सुरक्षा तथा श्रम सम्बन्धी सचेतना अभिवृद्धि गर्ने उद्देश्यले संवाद र छलफल हुने आयोजकले जनाएका छन् । साथै कार्यक्रमको विशेष आकर्षणको रुपमा दुबईमा स्थापित नेपाली कलाकारहरूको सांगीतिक प्रस्तुति समेत पनि रहनेछ।
कार्यक्रममा चर्चित गायक दीपक शाह ठकुरी, नरेन सापकोटा, गायिका कविता रानाभाटको सांगीतिक प्रस्तुति रहनेछ भने, नृत्य तर्फ निरु तामाङको प्रस्तुति हुनेछ। साथै, हास्य कलाकारहरु शिव सापकोटा, एल पी खनाल,कामना केसी , आरबी न्यौपाने,मनिता पाण्डे, अशोक बोगटी लगायतको प्रस्तुति रहनेछ।
प्रवेश निःशुल्क रहने उक्त कार्यक्रममा श्रमिक, विद्यार्थी तथा यूएईस्थित सम्पूर्ण नेपाली समुदायलाई उपस्थित भई जानकारी लिन नेपाली समाज यूएईका अध्यक्ष राम मोक्तानले आग्रह गरेका छन ।
कार्यक्रममा १० बर्ष भन्दा लामो समयदेखी यूएईमा काम गरिरहेका महिलाको हकमा ५० पुरा भएका तथा पुरुषको हकमा ५५ वर्ष उमेर पुगेकाहरुलाई सम्मान गर्ने कार्यक्रम रहेको आयोजकले जनाएको छ ।