दुबई । पाल्पाली समाज यूएईले रक्तसञ्चार पाल्पालाई आर्थिक सहयोग प्रदान गरेको छ । समाजले नेपाल रेडक्रस सोसाइटी, पाल्पा शाखाअन्तर्गतको रक्तसञ्चार सेवा प्रवर्धनका लागि एक लाख एक सय एघार रुपैयाँ आर्थिक सहयोग प्रदान गरेको हो ।
“हाम्रो ब्लड बैंक हामी बनाउँछौं” भन्ने नारासहित सुरु गरिएको महाअभियानलाई सहयोग पुर्याउने उद्देश्यले वैदेशिक रोजगारीका लागि यूएईमा कार्यरत पाल्पालीहरूको समन्वयमा उक्त रकम हस्तान्तरण गरिएको हो।
उक्त सहयोग राशिको हस्तान्तरण कार्यक्रम पाल्पा जिल्लास्थित रेडक्रस सोसाइटीको सभाहलमा सम्पन्न भएको थियो। कार्यक्रममा पाल्पाली समाज यूएईका तर्फबाट समाजका पूर्व अध्यक्ष एवं सल्लाहकार वेदप्रसाद अर्याल, पूर्व संरक्षक गीतामणि पाण्डे, पूर्व महासचिव धनु क्षेत्री, पूर्व उपाध्यक्ष विष्णु बस्याल, पूर्व प्रवक्ता युबी भट्टराई तथा वर्तमान वरिष्ठ उपाध्यक्ष कृष्ण तिमिल्सिना, कोषाध्यक्ष डिल्ली भट्टराई लगायतको उपस्थिति थियो।
कार्यक्रमको अध्यक्षता वरिष्ठ उपाध्यक्ष कृष्ण तिमिल्सिनाले गर्नुभएको थियो भने कार्यक्रममा पाल्पाका राजनीतिक दलका प्रतिनिधि, जनप्रतिनिधि, सरकारी उच्च अधिकारी, पत्रकार महासंघका सदस्यहरू तथा नागरिक व्यक्तित्वहरूको उल्लेख्य उपस्थिति थियो।
सन् २०१५ मा युएईको मरुभूमिमा, खजुरको रुखमुनि स्थापना भएको पाल्पाली समाज यूएईले हालसम्म पाल्पा जिल्लाका ६८ वटा आधारभूत विद्यालयमा करिब २० लाख रुपैयाँ बराबरको अक्षयकोष स्थापना गरिसकेको छ।
समाजले विगतमा नेपालमा आउने प्राकृतिक विपद् भूकम्प, आगलागी, महामारी लगायतका संकटमा राहत तथा पुनर्निर्माणमा सहयोग पु-याउँदै आएको छ। साथै, युएईमा कार्यरत नेपाली, विशेषतः पाल्पालीहरूलाई आइपर्ने समस्या, मृत्यु, बिरामीको उपचार तथा शव नेपाल पठाउने कार्यमा समेत समाजले निरन्तर सहयोग गर्दै आएको अध्यक्ष कैलास अर्यालले जानकारी दिनुभयो। – राजा बगरको सहयोगमा
