दुबई, यूएई – मधेशी एकता समाज यूएईले गएको आइतबार बरदुबईस्थित क्लब एसके सेभेनमा होली सांस्कृतिक समारोहको आयोजना गरी मनाएको छ । ७०० भन्दा बढी मधेशी समुदायको उपस्थिति रहेको कार्यक्रममा पूर्व उपप्रधानमन्त्री तथा जनता समाजवादी पार्टी (जसपा) नेपालका अध्यक्ष उपेन्द्र यादवको प्रमुख आतिथ्यता तथा समाजका यूएई अध्यक्ष रोशन मार्क्सिस्टको सभापतित्वमा भएको हो ।
समारोहको उद्घाटन महासचिव सुरेश यादव र सह-अध्यक्ष/प्रवक्ता शैलेन्द्र रायले गरेका थिए भने सांस्कृतिक कार्यक्रमको सञ्चालन भोला पासवान र मनोज परदेशीले गरेका थिए। स्वागत मन्तव्य यूएईमा नर्सका रूपमा कार्यरत चर्चित टिकटक स्टार सुगम शर्माले प्रस्तुत गरेकी थिइन्।
सांस्कृतिक प्रस्तुति र सम्मान कार्यक्रम
कार्यक्रममा सांस्कृतिक नृत्य, होली गीत, जोगिरा गायन तथा विभिन्न परिकारहरूको व्यवस्था गरिएको थियो। नेपालबाट आएका चर्चित कलाकार रविराज साह र शोभा पासवानले विशेष प्रस्तुति दिएका थिए भने स्थानीय कलाकारहरू भोला पासवान, ईशा, अनाया, भिरु यादव, स्लोन्ली एन्जल र नेपाली बोइज ग्रुपले आकर्षक प्रस्तुति दिएका थिए।
यस अवसरमा यूएईमा भूउपग्रहको सफ्टवेयर डिजाइन गर्ने मुकेश झा, मिसाइल डिजाइनमा कार्यरत इन्जिनियर दीपक कुमार यादव, दुबईमा कारखाना स्थापना गर्ने पहिलो मधेशी उद्यमी विनेश यादव, गणेश पूर्वे र जीवछ साहलाई सम्मान गरिएको थियो।
समाजका गतिविधि र आगामी योजनाहरू
समारोहमा प्रमुख अतिथि उपेन्द्र यादव, राजदूत तेज बहादुर क्षेत्री र डा. रबिन्द्र कुमार यादवले मन्तव्य दिएका थिए। डा. यादवले संयुक्त राष्ट्र संघको अल्पसंख्यक फोरममा आफ्नो सहभागिता, काठमाडौंमा मधेशका सबै दलबीच भएको अन्तरक्रिया, समाजको जापान, युरोपियन युनियन र अमेरिका लगायतका देशहरूमा विस्तार, मधेशमा शिक्षाको स्तर उन्नतिका लागि चालेका कदम, श्रमिकहरूको सुरक्षाका उपायहरू तथा विप्रेषणको गुणस्तर सुधारमा समाजको योगदानबारे जानकारी गराए।
उनले श्रमिकहरूलाई विदेशमा समस्या पर्दा उद्धार गर्ने, मधेशमा प्राकृतिक विपत्तिको समयमा सहयोग पुर्याउने, मधेश आन्दोलनका शहीद परिवारलाई सहयोग गर्ने र मधेश मुद्दालाई अन्तर्राष्ट्रिय रूपमा स्थापित गर्न भूमिका खेल्ने समाजका प्रमुख उद्देश्य रहेको बताए।
नेपालमा होली मार्च १४ मा भए पनि इस्लाम धर्मावलम्बीहरूको पवित्र महिना रमजान फेब्रुअरी २८ देखि मार्च ३० सम्म रहने भएकाले दुबईमा होली समारोह फेब्रुअरी ২৩ मा नै आयोजना गरिएको आयोजकहरूले बताएका छन्।
यस कार्यक्रमले यूएईस्थित नेपाली समुदायबीच आपसी मेलमिलाप र सांस्कृतिक पहिचान प्रवर्द्धन गर्न महत्वपूर्ण योगदान दिएको सहभागीहरूले बताएका छन्।
कार्यक्रममा आबुधाबीस्थित नेपाली दूतावासका राजदूत तेज बहादुर क्षेत्री, मधेशी एकता समाजका संस्थापक तथा अन्तर्राष्ट्रिय अध्यक्ष डा. रबिन्द्र कुमार यादव, श्रम सहचारी पंकज लावकर्ण, दूतावासका तृतीय सचिव बिमलेश मिश्र, मधेशी एकता समाज नेपालका संयोजक डा. बबी सिंह यादव, अन्तर्राष्ट्रिय समितिका महासचिव मुकेश झा, एनआरएनए यूएईका महासचिव भुवन कुमार वाग्ले, नेपाल जनप्रगतिशील मञ्च यूएईका अध्यक्ष लक्ष्मण खनाल, नेपाल पत्रकार महासंघ यूएईका अध्यक्ष मेघराज सापकोटा, कायकल्प टिभी/च्यानलका कृष्ण कुमार दुलाल, नेपाल विश्वकर्मा समाजका अध्यक्ष गगन बीके, कोच राजवंशी प्रवासी समाजका शोभा राजवंशी र सावित्री राजवंशी लगायतका विशिष्ट व्यक्तिहरूको उपस्थिति थियो।
