आबुधावी । नेकपा माओवादी केन्द्रको एसिया प्रदेश समितिले बाढीपहिरो पीडितको सहयोगका लागि भन्दै १३ लाख ७८ हजार ३ सय ३९ रुपैयाँ पार्टी अध्यक्ष प्रचण्डलाई हस्तान्तरण गरेको छ ।
माओवादी केन्द्रले स्थापना गरेको केन्द्रीय राहत कोषमा रहने गरी समितिले सो रकम पार्टी अध्यक्ष प्रचण्डलाई हस्तान्तरण गरेको हो ।
नेकपा माओवादी केन्द्र एसिया प्रदेश समितिका इञ्चार्ज पम्फा भुसालको उपस्थितिमा केन्द्रिय सदस्य डिबी क्षेत्री, प्रवास प्रदेश कार्यालयका मुख्य सचिव टिबी पाठक, प्रदेश समितिका सहसचिव दीपक पुन, सदस्य ईश्वर कठायत लगायतका पदाधिकारीहरुले सो रकम चेक मार्फत पार्टी अध्यक्ष प्रचण्डलाई हस्तान्तरण गरेको प्रचण्डको सचिवालयले जनाएको छ ।
चेक ग्रहण गर्दै अध्यक्ष प्रचण्डले बाढीपहिरो पीडितको सहयोगका लागि बिदेशमा बस्ने पार्टीका शुभचिन्तकहरुको पहलकदमीका लागि धन्यवाद ब्यक्त गरे । पार्टीले बाढीपहिरो पीडितको उद्धार, राहत र पुनर्स्थापनाका लागि पहलकमदी लिएको जानकारी दिंदै उनले सरकारको ध्यानाकर्षण गराउने र पार्टी आफैंले पनि कार्यकर्ता परिचालन गर्ने काम गरेको बताउनुभयो ।
विपदबाट ठूलो क्षति भएकाले सबै मिलेर अब पुनर्निर्माण र पुनर्स्थापनामा जोड दिनुपर्ने प्रचण्डको भनाइ छ ।
एसिया प्रदेश समितिले २७ सेप्टेम्बर देखि २२ अक्टोबर सम्म गरेर सो रकम सन्कलन गरेको थियो । सो अबधिमा १३ लाख ७८ हजार ३ सय ३९ रुपैया संकलन गरेको र त्यो रकम मध्ये ४० हजार रुपैया अखिल(क्रान्तिकारी)ले बाढी पहिरो पिडितको लागी तत्काल खाना खुवाउने अभियानको लागी सहयोग समितिका कोषाध्यक्ष बाबुराम विस्वकर्माले बताउनुभयो । त्यस्तै सन्कलित रकम मध्ये पहिलोपतक ५ लाख रुपैया र दोस्रोपटक मंगलबार ८ लाख ३८ हजार ३ सय ३९ रुपैया चेक मार्फत पार्टी अध्यक्ष प्रचण्डलाई हस्तान्तरण गरिएको एसिया प्रदेश समितिका सह सम्योजक हरी विवस नेपालीले जानकारी दिनुभयो ।
