दुबई । उपेन्द्र सुब्बाको लेखन तथा निर्देशन रहेको चलचित्र ‘मनसरा’ बिहीवार (मे ९) बाट दुबई सहित मध्यपुर्वका बिभिन्न मुलुकका धेरै शहरहरुमा प्रदशन हुने भएको छ ।
तीन दिन पहिले रिलिज भएको मनसराले बक्स अफिसमा उत्साहजनक ओपनिङ गरिरहेको छ । नेपाल रिलिजको साता दिनमा ‘मनसरा’ मध्यपूर्वमा रिलिज हुँदैछ । अन्तर्राष्ट्रिय वितरण कम्पनी सेभेन सिजले यो फिल्मलाई युएई, कतार, बहराइन, ओमान र कुवेतमा एकै पटक रिलिज गर्न लागेको हो ।
मध्यपूर्वका ठूला चेनहरु भक्स स्टार, सिने रोयल, सिनेपोलिस, सिनेको र नोभामा फिल्म प्रदर्शन हुने वितरक रमेश ढकालले जनाए । यी मल्टिप्लेक्सका मुख्य गेटमा ३/३ मिटरका फ्ल्याट स्ट्यान्ड लगाएको उनले जनाए । ‘यो नेपाली चलचित्र बजारका लागि सफलता हो’ उनले भने ।
चलचित्र मनसराको प्रिमियर शोपछि कलाकार तथा दर्शकहरुले सबै फूलहरुको एउटै बगैँचा भनेर उपमा दिएका छन ।
मध्यपूर्वका देशहरुमा चलचित्र प्रदशन हुन लागेपछि पछील्लो समय नेपाली चलचित्रको बजार फैलिन लागेको छ । खाडीका देशमा कार्यरत नेपालीहरुले काम बाट बचेँको समय मिलाएर नेपाली भाषाका चलचित्र हेर्न पाएकोमा गौरव गर्न लागेका छन । सधैं जसो बिदेशी चलचित्र र तीनैका पोस्टरमात्र देखेका नेपालीहरुले आफ्नै भाषा र आफ्नै मुलुकका चलचित्र हेर्न पाउदा खुशी लागेको जनाएका छन ।
देशब्यापी रिलिज भएको फिल्मका शो खचाखच भरिएका थिए भने चलचित्र घरेलु बक्स अफिसको शीर्षस्थानमा छ । निर्माताहरुले ‘बम्पर’ ओपनिङ भएको बताएका छन् ।
उपेन्द्र सुब्बाको कलात्मक प्रस्तुती, शैलेन्द्रध्वज कार्कीले निर्माण गरेको फिल्ममा दयाहाङ राई, प्रवीण खतिवडा, मिरुना मगर र मेनुका प्रधान मुख्य भूमिकामा छन् । फिल्मका छायांकार पनि कार्की नै हुन् ।
फिल्ममा विष्णुकुमार लिम्बु, मनोरथ पोखरेल, पर्शु अधिकारी, पिटर गुरुङ तथा जीवन लिम्बु थाक्लुङ सह निर्माता छन् ।
निमेश श्रेष्ठको सम्पादन, अर्जुन कार्कीको रंग संयोजनको साथमा श्रवल राज पाण्डेको साउण्ड डिजाइन रहेको छ भने मानाहाङ लावती, मनिक शंखर र सुभम चाम्लिङ राईको संयुक्त कला निर्देशन छ ।
