आबुधावी । राष्ट्रिय कलाकारहरुको उपस्थितिमा युएईमा पछिल्लो समय एकपछि अर्को सांगीतिक कार्यक्रम भइरहेको छ । नेपाल बाहिर रहेका र नेपाली संगीतलाई माया गर्ने पारखीका लागि यो सुखद पक्ष हो ।
विदेशमा हुने नेपाली सांगीतिक कार्यक्रमले विश्व बजारमा नेपाली संगितलाई चिनाउन समेत मद्दत गदै आएको आयोजकहरुको दावी छ ।
युएईका मुख्य शहर दुवई र आबुधाबीमा हरेक हप्ता जसो नेपाली कार्यक्रम हुने गरेकाछन । यी दुई शहरमा पछिल्लोे एक महिनाको अवधीमा दर्जन बढी कलाकारले सांगीतिक प्रस्तुती दिएका छन् ।
नयाँवर्षको सुरुवातमै उदय सोताङ र मनिला सोताङले दुबई र आबुधाबीमा सांगीतिक प्रस्तुती दिए । सोही समय युवापुस्ताका रुचाइएका गायक सुसान्त केसीले तन्नेरिहरुलाई मनोरन्जन दिए ।
त्यसअघि गायक पुप्पन प्रधान, मेलीना राई, दिपक ब्रजाचार्य, छेवाङ्ग लामा लगायतका कलाकारको उपस्थितिमा कार्यक्रम भयो । अप्रिल दोस्रो साता हामी नेपाली नामक ग्लोबल सस्थाले गायीका आस्था राउत लगायतलाई युएईमा ल्याएको थियो ।
यस्तै अप्रिल दोस्रो साता लोकश्रष्टा नारायण रायमाझी , शान्ति श्री परियार , कुलेन्द्र विश्वकर्मा लगायतले नेपाली समाज युएईको ३५ औँ स्थापना दिवसमा लोक संगीतबाट दर्शक श्रोता झुमाए ।
यहीसाता कर्णप्रिय गायक कर्णदाशले दुवईका श्रोतामाझ सांगीतिक कोशेली पस्किए । उनको आधुनीक र देशभक्त गीतमा दर्शक श्रोताले देशको वर्तमान अवस्था र परिवारबाट टाढा हुदाँको झल्को दर्शाए ।
यस्तै नेपालको पप संगीतमा नाम चलेको द इज व्याण्डले गत आइतबार आबुधाबीमा सांगीतिक कार्यक्रम गर्यो । उक्त कार्यक्रममा बाक्लो रुपमा दर्शकको उपस्थिति थियो ।
हप्तामा एकदिन हुने छुट्टिमा यस्ता कार्यक्रमले मनोरञ्जन दिलाउने गरेको कार्यक्रमा सहभागी दर्शकको भनाई छ । यहाँको सार्वजनिक विदाको दिन कार्यक्रम हुने भएकाले पनि दर्शकको उपस्थिति हुने गरेको नेपाल डिउड आबुधाबीका निमा शेर्पा बताउँछन् ।
विदेशमा रहेका नेपाली दर्शक श्रोतालाई नेपाली संगीत मार्फत मनोरञ्जन र संगीत बजार विस्तारका लागि यस्ता कार्यक्रम आवश्यक रहेको शेर्पाको भनाई छ ।
युएईको नेपाली समुदायमा आजसम्म नेप्थ्यको कार्यक्रममा सबैभन्दा धेरै दर्शकको उपस्थिति रहेको रेकर्ड छ । देशबाहिरका नेपाललीले कलाकारलाई सधै माया र सम्मान गर्ने गरेको युएईमै रहेका रुन्चे गायक प्रकाश पौडेलको बुझाई छ ।
आगामी आइतबार दुबई शहरमा दुई अलग स्थानमा नेपाली कार्यक्रम हुँदै छन । काली गण्डगी सेवा समाज स्याङ्जाले आयोजना गर्ने कार्यक्रममा खुमान अधिकारी, एलिना चौहान, उमादेवी खनाल लगायतले आफ्नो प्रस्तुती दिदै छन ।
त्यस्तै मे ५ आइतबारनै दुबईमा एभरेष्ट साझ नामक कार्यक्रम समेत हुँदै छ । जसमा आधुनिक गीत सङीतका पारखीलाई झुमाउन पुराना गायक यम बराल , खेम सेन्चुरी, सुनिता थेगिम, र प्राश्ना शाक्य दुबई आउँदै छन ।
यसरी गरिने कार्यक्रम केही व्यवसायिक उद्देश्यले त धेरै जसो सामाजिक सहयोगार्थ हुने गरेका छन । सामाजिक संघसस्थाले गरेका कार्यक्रम देखी ब्यवसायिक उद्देश्यले गर्ने कार्यक्रमहरुलाई यहाँ रहेका नेपाली व्यवसायीहरुले सहयोग गर्ने गरेका छन । पछिल्लो समय धेरैजसो संघसस्थाले गर्ने कार्यक्रममा एनआरएन अभियान्ता तथा व्यवसायी पासाङ शेर्पाले सहयोग गर्ने गरेका छन ।
यो साता चर्चित कलाकारलाई विदाइ गरेको आयोजक अर्को साता मंगोलीयन हर्टलाई आबुधावीमा स्वागत गर्ने तयारीमा छ । मे ५ तारिख आबुधाबीको इमिरेट्स प्लाजामा हुने कार्यक्रममा मंगोलीयन हर्टका राजु लामा सहितको टीमले सांगीतिक प्रस्तुति दिने आयोजक नेपाल डिउड आबुधाबीले जनाएको छ । कार्यक्रममा चर्चित डिजे शेर्पेनीको समेत प्रस्तुति रहने छ ।
त्यस्तै आबुधावीमा आउदो ईद विदाको अवसर पारेर संगीतिक कार्यक्रम गर्ने र त्यसमा नेपालका चर्चित कलाकारलाई ओराल्ने तयारी इनास
(अन्तरास्ट्रिय कलाकार समाज ) आबुधावीका अध्यक्ष अस्मत घिमिरेले बताए ।
नेपाल डिउड र जात्रा इभेन्टसको संयुक्त आयोजनमा कार्यक्रम हुन लागेको हो । नयाँवर्ष लागेसगैँ नेपाली चाडपर्व समेत सुरु हुने भएकाले हरेक साता कार्यक्रमको तालिका रहेको आयोजकहरुले बताएका छन् ।
