आबुधावी । युएईको आबुधावीमा निशुल्क स्वास्थ्य शिविर भएको छ । आबुधावीमा रहेका नेपालीका लागि भनेर युएईको प्रतिष्ठित अल अहालिया हस्पिटलको प्राविधिक तथा चिकित्सकीय सहयोग तथा एनआरएन युएईको सहकार्यमा भएको स्वास्थ्य शिविरमा ५० जनाले स्वास्थ्य परिक्षण गरेका छन ।
शिविरमा २३ जना महिला र २७ जना पुरुषले स्वास्थ्य परिक्षण गरेको अस्पतालकी कार्यक्रम सम्योजक प्रज्ञा घिमिरे शर्माले बताइन । निशुल्क रुपमा राखिएको शिविरमा अधिकाशं पारिवारिक घुमघामका लागि युएई आएका, तथा इन्सुरेन्स समेत नभएकाहरुले स्वास्थ्य परिक्षण गराएको शर्माको भनाइ छ ।
शिविरमा मधुमेह, रक्तचाप, आँखा लगायत विभिन्न रोगको परीक्षण गरिएको एनआरएन युएईकी उपाध्यक्ष सोनाम श्रेष्ठले जानकारी दिईन ।
शिविरमा ७० बर्षिय जेष्ठ महिलाले समेत श्वास्थ्य परिक्षण गराएको एनआरएन युएईले जनाएको छ । अस्पतालले आगामी मे ३ तारिक नेपाली समुदायलाई लक्षित गर्दै खुल्ला रक्तदान कार्यक्रम समेत राखेको जनाएको छ ।
