हालखबर/काठमाडौ । धितोपत्र बजारका सबै क्षेत्रमा अब एनआरएनले लगानी गर्न पाउने भएका छन । नेपाल धितोपत्र बोर्डले गरेको एक अध्ययनले एनआरएनएलाई सबै क्षेत्रमा लगानी गर्न सुझाव दिएको छ ।
बोर्डले एनआरएनलाई धितोपत्रको दोस्रो बजारमा भित्र्याउने विषयमा सञ्चालक सदस्य सुजनकुमार काफ्लेको नेतृत्वमा गठन गरेको समितिले यस्तो सुझाव दिएको हो । जसमा बोर्डका विज्ञ सदस्य भोलानाथ ढुंगाना सदस्य, बोर्डका कार्यकारी निर्देशक मुक्तिनाथ श्रेष्ठ सदस्य र बोर्डकै सदस्यसचिव दीपा दाहाल सदस्य रहेका थिए । समितिले चार महिनाको अध्ययनपछि प्रतिवेदन तयार पारेको हो ।
एनआरएनएलाई धितोपत्र बजारमा लगानी गर्न विदेशी लगानी तथा प्रविधि हस्तान्तरण ऐन, २०७५ को दफा १० मा संशोधन गरिनुपर्ने प्रतिवेदनमा उल्लेख छ । ‘गैरआवासीय नेपालीले नेपालको धितोपत्र बजारमा तोकिए बमोजिमका क्षेत्र तथा उपकरणमा लगानी गर्न सक्ने व्यवस्था गर्नुपर्ने र यसरी लगानी गर्ने क्षेत्र तथा उपकरणका सम्बन्धमा नेपाल सरकारसँगको समन्वयमा नियामक निकायले समय–समयमा तोकेबमोजिम व्यवस्था गर्नुपर्ने’ भन्ने बुँदालाई ऐनमा नै राख्नुपर्ने प्रतिवेदनको सुझाव छ ।
बोर्डले विदेशी लगानी तथा प्रविधि हस्तान्तरण ऐन, २०७५ का केही बुँदाहरू संशोधन गर्नुपर्ने, नेपाल राष्ट्र बैंक र धितोपत्र बोर्डले पनि केही नयाँ व्यवस्था गर्नुपर्ने आवश्यकता औँल्याएको छ ।
त्यस्तै, एनआरएनएले धितोपत्रको दोस्रो बजारमा गरेको लगानीबाट आर्जित मुनाफा तथा लाभांशको विप्रेषणको हकमा वार्षिक १० लाखसम्म फिर्ता लैजान सक्ने व्यवस्था गर्न सुझाव दिएको छ । यसका लागि सरकारले विदेशी लगानी ऐनको दफा २० लाई संशोधन गर्नुपर्ने जनाएको छ ।
साथै, बजारमा सुरुमा गरिएको लगानी रकम फिर्ता लैजान चाहेमा सीमा नलाग्ने व्यवस्था गर्न सुझाएको छ ।
साथै, एनआरएनएले व्यक्तिगत रूपमा धितोपत्रसम्बन्धी दोस्रो बजारमा कारोबार गर्न पाउने व्यवस्था गर्नुपर्ने, लगानीका लागि स्वीकृति लिनुपर्ने व्यवस्था हटाउनुपर्ने, नियमनकारी निकायबाट जारी नियमावलीबमोजिम लगानी गर्न सकिने व्यवस्था गर्नुपर्ने सुझाव दिएको छ ।
सरकारले चालू आर्थिक वर्ष ०८०/८१ को बजेटमार्फत एनआरएनएलाई नेपालको धितोपत्र बजारमा प्रवेश गराउने व्यवस्था गरेको थियो । तर, सरकारले जलविधुत तथा उत्पादन क्षेत्रमा मात्रै लगानी गर्ने वातावरण मिलाउन भनेको थियो । तर, बोर्डले गरेको अध्ययनले लगानीका लागि सबै क्षेत्र खुल्ला गर्नुपर्ने सुझाव दिएको हो ।
