अबुधाबी। यूएईमा कार्यरत धरानेहरूको साझा सामाजिक संस्था धरान हेल्पिङ ह्याण्ड्स यूएईले उपचार अभावमा रहेका दुई जना बिरामीलाई आर्थिक सहयोग प्रदान गरेको छ।
धरानेहरूको साझा संस्थाको रूपमा स्थापित यूएईको नेपाली समुदायको पुरानो सामाजिक संस्थामध्ये एक धरान हेल्पिङ ह्याण्ड्स यूएईले सामाजिक उत्तरदायित्व अन्तर्गत सञ्चालन गर्दै आएको मानवीय सहयोग कार्यक्रममार्फत चितवन निवासी बोन म्यारो क्यान्सरबाट पीडित नैना देवी भट्ट राईलाई ६६ हजार ६ सय ४४ तथा धरान १४ निवासी तथा धरान हेल्पिङ ह्याण्ड्स यूएईका पूर्व सदस्य, मिर्गौला रोगबाट पीडित रमेश श्रेष्ठलाई १ लाख २ हजार ५ सय ७५ रुपैया आर्थिक सहयोग गरेको जनाएको छ।
सहयोग रकम संस्थाका पदाधिकारीहरूले सम्बन्धित बिरामीको निवासमै पुगेर हस्तान्तरण गरेका हुन्। सहयोग हस्तान्तरण कार्यक्रममा संस्थाका पदाधिकारीहरूको उपस्थिति रहेको थियो।
संस्थाका अध्यक्ष ईश्वर श्रेष्ठले यस सहयोग अभियानमा आर्थिक, नैतिक तथा भौतिक रूपमा सहयोग पुर्याउनुहुने सम्पूर्ण सहयोगीहरूलाई धन्यवाद व्यक्त गर्दै आगामी दिनहरूमा पनि यस्ता सामाजिक तथा मानवीय कार्यलाई निरन्तरता दिइने प्रतिबद्धता व्यक्त गरेका छन्।