अबुधाबी – नेपाली दुतावास आबुधावीले दुई दिने अतिरिक्त सेवा मार्फत निशुल्क स्वास्थ्य परिक्षण तथा राहदानी नवीकरण सेवा प्रदान गरेको छ । यहाँ कार्यरत नेपाली श्रमिक तथा समुदायलाई लक्षित गर्दै निःशुल्क स्वास्थ्य सेवा र राहदानी नवीकरण सेवा प्रदान गरेको हो । गएको बुधवार र आज गरी सम्पन्न दुईदिने विशेष शिविरमा सयौं नेपाली श्रमिकहरू लाभान्वित भएका छन्। अतिरिक्त सेवाका लागि दुतावासले अघिल्लो साता सूचना प्रकाशन गर्दै सार्वजनिक आवह्वान गरेको थियो ।
अहलिया हस्पिटल आबुधावीको प्राविधिक तथा चिकिस्तकिय सहयोगमा करिब ३०० जनाले आँखा, मधुमेह (डायबेटिज) र रक्तचाप सम्बन्धी निःशुल्क परीक्षण गराएका थिए। शिविरमा स्वास्थ्य परीक्षणसँगै मानसिक स्वास्थ्य सम्बन्धी परामर्श सेवा पनि प्रदान गरिएको अस्पतालकी बजार प्रबन्धक तथा नेपाली समुदाय हेर्ने प्रज्ञा घिमिरेले बताइन । शिविरका लागि अस्पतालले नेपाली डाक्टर यासिर श्रेष्ठको नेत्रित्वमा चिकित्सकको टोली खटाएको थियो ।
शिविरको दोस्रो दिन शुक्रबार दूतावासले राहदानी नवीकरण तथा अन्य कन्सुलर सेवा प्रदान गरेको थियो। सो अवसरमा करिब ५०० भन्दा बढी नेपाली श्रमिकहरूले राहदानी नवीकरण, बायोमेट्रिक विवरण संकलन लगायतका सेवा प्राप्त गरेका थिए।
दुतावासका अनुसार, यूएईमा कार्यरत श्रमिकहरूको सुविधालाई ध्यानमा राखी शिविर सञ्चालन गरिएको हो। दूतावासको अतिरिक्त सेवा कार्यक्रममार्फत श्रमिकहरूलाई आवश्यक स्वास्थ्य तथा प्रशासनिक सेवा, श्रम सचेतना सम्बन्धी जनचेतना मुलक कार्यक्रम प्रस्तुत गरेको दुतावासकी प्रवक्त्ता तथा नियोग उपप्रमुख रन्जिता दाहालले जानकारी दिईन ।
यूएईमा रही नेपाली श्रमिकहरूले भोगिरहेका विभिन्न समस्या तथा सीमित पहुँचलाई मध्यनजर गर्दै दूतावासले आगामी दिनमा यस्ता सेवा शिविरलाई थप प्रभावकारी बनाउँदै लैजाने जनाएको छ।
शिविर सफल बनाउन एनआरएन, नेपाली समाजले स्वयंसेवक खटाएर उल्लेखनीय सहयोग गरेको दूतावासले प्रेस विज्ञप्ती जारी गर्दै उल्लेख गरेको छ ।
