आबुधावी । संयुक्त अरब इमिरेट्स (यूएई)का बिभिन्न जेलमा रहेका १६६ जना नेपालीले आममाफी पाएका छन। नेपाल सरकारको अनुरोधमा संयुक्त अरब इमिरेट्स (यूएई) सरकारले १६६ जना नेपाली कैदीलाई आममाफी प्रदान गरेको परराष्ट्र मन्त्रालयले जनाएको छ। यसैबीच कतार सरकारले बिभिन्न जेलमा रहेका १८ जना नेपालीलाई आममाफी दिएको छ।
मुस्लिम समुदायको पवित्र महिना रमजान तथा ईद पर्वको खुसीयाली स्वरूप यूएई तथा कतार सरकारले यो मानवीय निर्णय लिएका हुन ।
नेपाल सरकारको परराष्ट्र मन्त्रालयले धन्यवादपत्र जारी गर्दै यूएई तथा कतार सरकारलाई धन्यवाद समेत प्रकट गरेको छ। मन्त्रालयका अनुसार यो आममाफी द्विपक्षीय सम्बन्ध सुदृढ बनाउने मानवता र आपसी सौहार्दताको प्रतीक पनि हो।
परराष्ट्र मन्त्रालयले जानकारी दिएअनुसार नेपाल सरकारको अनुरोधमा अबुधाबी तथा दोहामा रहेको नेपाली दूतावासले ती देशका सरकारसँग आममाफीको पहल गरेका थिए । सोही अनुरोधको आधारमा दुबै देशका सरकारले कैदीहरूलाई क्षमा दिएका हुन ।
नेपाल सरकारले यस निर्णयलाई मानवीय आधारमा लिइएको महत्वपूर्ण कदमका रूपमा लिएको छ। मन्त्रालयले यस किसिमको सहकार्यले नेपाल-यूएई, नेपाल-कतार सम्बन्धलाई अझ बलियो बनाउने विश्वास व्यक्त गरेको धन्यवाद पत्रमा उल्लेख गरिएको छ। के कस्ता कैदिहरुले आममाफी पाएका हुन भन्ने बिषय विज्ञप्तीमा उल्लेख गरिएको छैन।
