दुबईमा आयोजना भएको मध्यपुर्व अर्गानीक तथा कृषिजन्य बस्तुको प्रदशनीमा नेपालले पहिलो पटक सहभागीता जनाएको छ । प्रदशनीमा नेपालले आफ्नो उतापदनको प्रतिनिधित्व गर्दै नेपाली अर्गानिक सामाग्रीलाई समावेश गरी नेपाली प्याभिलियननै स्थापना गरी प्रदशनीमा सहभागी भएको हो । यही नोभेम्बर १८ देखी २० नोभेम्बर सम्म चलेको प्रदशनीमा नेपाली उत्पादनलाई अन्तर्राष्ट्रिय बजारमा प्रवर्द्धन गर्ने उद्देश्यले नेपालले पहिलो पटक सहभागीता जनाएको हो ।
नेपाल उद्योग वाणिज्य महासंघ, नेपाली दूतावास आबुधावी लगायत बिभिन्न निकायको समन्वयमा नेपालले यो सहभागीता जनाएको हो । प्रदशनी मार्फत नेपाली अर्गानिक उत्पादनलाई युएईको विश्वव्यापी बजारसम्म पुर्याउनु र प्रवर्द्धन गर्नु मुख्य उद्देश्य रहेको युएईका लागि नेपाली राजदुत तेजबहादुर क्षेत्रीले बताउनु भयो ।
नेपाली जडिबुटी, चिया, मसलाजन्य उत्पादन, हस्तकला, अलैंची, कफी र अन्य धेरै अर्गानिक सामानलाई विभिन्न नेपाली उत्पादक कम्पनीहरूले आफ्ना उत्पादनलाई प्रदर्शनीमा राखेका थिए ।
विश्वव्यापी व्यापार र पर्यटनको केन्द्र मानिने यूएई नेपाली उत्पादनलाई बजार प्रबर्दन गराउने सम्भावनाको राम्रो अवसरको रुपमा लिईएको छ । नेपाली प्याभिलियनले नेपाली अर्गानिक उत्पादनप्रति स्थानीय र अन्तर्राष्ट्रिय व्यवसायीहरूको ध्यान खिचेको सहभागी एनआरएन युएईका अध्यक्ष समेत रहेका व्यवसायी बिकास शाहीको भनाइ छ ।
नेपाली दुतावास आबुधावीको पहल र नेपाल उद्योग वाणिज्य महासंघको पूर्ण सहयोगको प्रशंशा गर्दै अध्यक्ष शाहीले आगामी दिनमा युएईको बजारमा नेपाली उत्पादनको पहुँच थप विस्तार हुने विश्वास व्यक्त गर्नुभयो ।
नेपाली अर्गानिक उत्पादनलाई युएईको बजारमा थप सशक्त बनाउनका लागि नेपाल सरकार, सम्बन्धित निकाय र सम्पूर्ण समुदायको निरन्तर हातेमालो आबश्यक रहेको यहाँ व्यवसाय गरिरहेका नेपालीहरुले बताएका छन । युएई जस्ता अन्तर्राष्ट्रिय बजारमा नेपाली उत्पादनको प्रभावकारी उपस्थिति देशको आर्थिक विकास र नेपाली पहिचानको प्रवर्द्धनको लागि महत्वपूर्ण हुने भन्दै प्रदशनीमा सहभागी उद्योग वाणिज्य महासंघको प्रतिनिधि टोली तथा युएईमा रहेका नेपाली ब्यवसायी तथा अन्य समुदायका व्यवसायी सँग नेपाली दुतावास आबुधावीमा अन्तर्कृया समेत गरिदै छ ।