चलचित्र पुर्ण बहादुरको सारंगीले मध्यपुर्वका हलहरुमा दर्शकको राम्रो साथ पाएको छ । नोभेम्बर ७ तारिखबाट युएईमा प्रर्दशनमा आएको चलचित्र सोमबार पनि दर्शकको राम्रो उपस्थितीमा प्रदर्शन भइरहेको छ । चलचित्रलाई दर्शकहरुले पनि राम्रो प्रतिक्रिया दिएका छन् ।
युएईमा चलचित्र हेरेर फर्किएका दर्शकले हालखबर अनलाइनसँग भने , धेरैपछि नेपालीपन बोकेको चलचित्र हेर्न पाएको जनाए । काठमाण्डौ घरभई हाल आबुधाबीमा कार्यरत ओसिन थापा मगरले भनिन् ‘आफुलाई हुर्काउन बुबाले गरेको संघर्ष सम्झिए । सन्तानका लागि बुबाले गरेको त्याग बुझन यो फिल्म हेर्नपर्ने रहेछ ’ उनले थपिन् ।
झापा घरभई दुवईमा कार्यरत राना अधिकारी चलचित्र राम्रो लागेको प्रतिक्रिया दिन्छन् । सामाजीक विषय वस्तुमा आधारित चलचित्र भएकोले समाजको कथा प्रस्तुत गरेको उनको धारणा छ ।
चलचित्र हेर्न युएईका हलमा उपस्थित दर्शक ।
चलचित्रको पहिलो भाग सामान्य रहेको तर मध्यान्तरपछिको कथावस्तुमा भने भावनासँग बढी जोडिएको काठमाण्डौ घरभई युएईमा कार्यरत नरिना शाहीले बताइन् । चलचित्रको कथावस्तुले धेरै ठाँउमा मनछोएर रुवाएको जनाइन् । पुर्ण बहादुरको भुमीकामा रहेका विजय बराल र पुर्ण बहादुरको छोरा कमल गन्धर्व ( कान्छा ) को भुमीकामा रहेका बाल कलाकारको अभिनय उत्कृष्ठ रहेको उनले बताइन् ।
चलचित्र हेरेका अधिकांश दर्शकले आप्नै कथासँग जोडिएको बताएका छन् । कतिपयले बुबासँग र कतिपयले छोरासँगको सम्बन्धमा आफ्नो कथा पाएको जनाएका छन् । कतिपयले भने चलचित्रमा आमाको कथालाई स्पष्ट नदेखाएको बताए ।
पुर्ण बहादुरको श्रीमतीको भुमीकामा रहेकी अञ्जना बराइलीको भुमीकालाई छोटो रुपमा देखाइएको छ । धेरैले उनको कथावस्तुलाई नेदेखाउदा खल्लो भएको जनाए । धार्दिग घरभइ युएईमा कार्यरत सुस्मिता लामाले भनिन् , ‘बुबाछोराको कथावस्तु एकदमै राम्रो लाग्यो । तर मध्यान्तरपछिको कथावस्तुमा आमा छोराको विषयलाई केही नदेखाएकाले खल्लो लाग्यो । ’ यस्तै छोरो शहरपसेपछि डाक्टर हुन उसले गरेको संघर्षलाई पनि कथावस्तुमा देखाएको भने राम्रो हुने उनको प्रतिक्रिया छ ।
समाजीक कार्यमा समेत आवद्द रहेका तथा युएईमा कार्यरत खेमराज बस्नेत भन्छन् ,‘चलचित्रले नयाँ पूस्तालाई नेपाली समाजको यर्थाथता बारे बुझ्न मद्दत गरेको छ । अहिलेको पुस्ताले हिजोको हाम्रो समाज र आजको समाजबीचको परिवर्तन थाहाँ पाउनेछन् ।’
युएईमा चलचित्रलाई यहाँका नेपाली व्यवसायीले समेत सहयोग गरेका छन् । युएईका दर्शकले चलचित्र हेरेको टिकट लिएर आएमा राइस एण्ड स्पाइसी रेस्टुरेन्ट शारजहाले आफ्नो रेष्टुरेन्टमा १५ प्रतिशत छुट दिने जनाएको छ ।
सरोज पौडेलले निर्देशन गरेको चलचित्रमा विजयसँगै प्रकाश सपूत, मुकुन भुसाल, अञ्जना बराइलीलगायत कलाकारको मुख्य भूमिका छ । चलचित्रमा संवाद महेश दवाडीले लेखेका छन् । निर्माता विनोद पौडेल र प्याट्रिक सुवेदी हुन् । कार्यकारी निर्मातामा रमेश चौलागाईं, हरि श्रेष्ठ र रमेश ढकाल छन् ।
मध्यपुर्वमा चलचित्रले राम्रो व्यपार गरिहेको निर्मातामध्येका एक रमेश ढकालले हालखबरलाई बताए । कतारमा भने नोभेम्बर १४ बाट चलचित्र प्रर्दशनमा आउने ढकालले बताए ।
