दैलेखबाट सुर्खेत जाँदै गरेको बस दुर्घटना हुँदा चार जनाको घटनास्थलमै मृत्यु भएको छ । दैलेखको रानीमत्तानजिक भएको दुर्घटनामा २५ जना घाइते भएका छन् ।
दैलेख बजारबाट सुर्खेततर्फ जाँदै गरेको बस अनियन्त्रित भइ सडकबाट करिब २ सय मिटर तल खसेको प्रहरीले जनाएको छ । दुर्घटनामा मृत्यु भएकाहरुको पहिचान खुल्न बाँकी छ ।
प्रहरीका अनुसार भिरालो ठाउँमा दुर्घटना भएकाले उद्धारमा कठिनाइ भएको छ । घाइतेहरूलाई उपचारका लागि प्रदेश अस्पताल पठाइएको छ । गाडीमा ३० जनाभन्दा बढी यात्रु रहेको प्रहरीले जनाएको छ ।
उता पाँचथरको हिलिहाङ गाउँपालिका ६ मा ट्रक दुर्घटना हुँदा एक जनाको मृत्यु भएको छ। चालकसहित दुई जना घाइते भएका छन् ।
हिलिहाङ २ सिंगापुरदेखि गोलिया लिएर झापा हिँडेको ना ४ ख ७१२३ नम्बरको ट्रक अनियन्त्रित भएर सडकदेखि करिब ५० मिटर तल खस्दा त्यसमा सवार पाँचथरको हिलिहाङ ३ निवासी भवानी शंकर पौडेलको घट्नास्थलमै मृत्यु भएको हो।
दुर्घटनामा इलाम सुर्योदय नगरपालिका १२ घर भएका ५२ वर्षीय तेजबहादुर दाश र ट्रक चालक झापा चारपाने निवासी ४० वर्षीय राजकुमार बस्नेत घाइते भएको जिल्ला प्रहरी कार्यालय पाँचथरका सूचना अधिकारी प्रहरी निरीक्षक बेनिलाल साहले जानकारी दिए ।
