आबुधाबी। युएईस्थित नेपाली दुतावास मार्फत राहदानी नवीकरण गर्नेको चाप बढ्दो छ । १० वर्षे राहदानीको म्यादअवधी सकिएसँगै नयाँ राहदानी बनाउन आउने सेवाग्राहीको संख्या बढ्न थालेको हो । सेवाग्राहीको बढ्दो चापलाई र समस्यालाई न्युनीकरण गर्न दुतावासले शनिवार अतिरिक्त सेवा संचालन गरेको छ ।
दुतावासले संचालन गरेको एकदिने विशेष सेवामार्फत २ सय ४० जना नेपालीले राहदानी नविकरण गरेका छन् । नेपाल फर्कन चाहाने एकजनालाई यात्रा अनुमति पत्र प्रदान गरिएको दुतावासले जनाएको छ ।
२०२४ डिसेम्बरभित्रमा राहदानी र भिसाको म्याद सकिएकाहरुलाई विषेश प्राथमिकता दिइ दुतावासले विदाको दिन शनिबार विषेश सेवा दिएको हो । अनलाइन फारमभर्दा तोकिएको मिती अघि नै राहदानी र भिसाको म्याद सकिएकाहरुलाई प्राथमिक्ता दिइ शनिवारपनि सेवा संचालन गरिएको दुतावासका दृतीय सचिव भुपेन्द्र प्रसाद घिमिरेले हालखबरलाई बताए ।
हाल दुतावासले हरेक दिन २ सयका दरले हप्तामा १ हजार अनलाइन फारम खुल्ला गर्ने गरेको र सोही अनुसार सेवा दिदै आएको थियो । तर आगामी डिसेम्बरको ९ देखी १३ तारिखका लागि २१ सय फारम खुल्ला गरिएको दुतावासले जनाएको छ । सेवाग्राहीको बढ्दो चापलाई ध्यान दिदै दैनीक संख्यामा बृद्दि गरिएको दृतीय सचिव घिमिरेले बताए । अतिरिक्त सेवामा दुतावासको तर्फबाट उपनियोग प्रमुख रन्जिता दाहाल , दृतीय सचिव भुपेन्द्र प्रसाद घिमिरे स्थानीय कर्मचारी दस्तुर सिंह लगायतले सेवाप्रवाह गरेका थिए ।
साथै युएईमा रहेका गैर आवासीय नेपाली संघ,नेपाली समाज लगायतका विभन्न संघसंस्थासँग समन्वय र सहकार्य गदै आगामी दिनमा नेपाली नागरिकका समस्या हल गर्ने र राहदानी सम्बन्धि घुम्तीसेवा तथा विषेश काउन्टर मार्फत सेवा दिदै जाने दुतावासले जनाएको छ ।यसअघि पनि दुतावासले गैर आवासीय नेपालीसंघ तथा नेपाली संघसंस्थासंगको समन्वयमा फुजेरा,रसअलखेमा लगायतका राज्यमा घुम्तिसेवा संचालन गरेको थियो।
युएईको सातराज्यमा रहेका नेपालीले अनलाइन फारममार्फत अपोइन्टमेन्ट लिने र अपोइन्टमेन्टमा तोकिएको मितीमा दुतावास आएर राहदानी बनाउने गरेका छन् । युएई सरकारले ल्याएको आममाफी कार्यक्रमका कारण पनि अहिले केहीमात्रामा सेवाग्राहीको चाप बढेको हो ।
आममाफी प्रकृयामा सहभागी हुनका लागि आबुधाबीमा रहेको दुतावास आउन पायक नपर्नेहरुले दुवईमा स्थापना गरिएको नेपाल हेल्प डेक्स मार्फत सेवा लिन सक्ने दुतावासले जनाएको छ ।