काठमाण्डौँ । सरकारले आठ देशका लागि राजदूत नियुक्त गर्न सिफारिश गरेको छ।
मन्त्रिपरिषद्को बैठकले आठ देशका लागि राजदूत नियुक्ति गर्न सिफारिश गर्ने निर्णय गरेको कानून, न्याय तथा संसदीय मामिलामन्त्री पदम गिरीले बताए। मन्त्री गिरीका अनुसार भारतका लागि लोकदर्शन रेग्मी र अमेरिकाका लागि चन्द्र घिमिरेलाई राजदूतमा सिफारिश गरिएको छ।
त्यस्तै, दक्षिण कोरियाका लागि सुशील प्याकुरेल, डेनमार्कका लागि सुम्निमा तुलाधर, बेलायतका लागि डा. विजन पन्त, स्पेनका लागि पुष्पराज राजकर्णिकार, मलेशियाका लागि नेत्रप्रसाद तिमल्सेना र साउदी अरबका लागि अबुसुफ्यान खान मुसलमानलाई राजदूतमा सिफारिश गरिएको छ।
यसअघिको सरकारले पठाएका ११ राजदूतलाई फिर्ता बोलाइएको थियो। उनीहरूको स्थानमा नयाँ राजदूत पठाउने सत्तारूढ दलबीच सहमति भएको थियो।
त्यसका आधारमा नेकपा (एमाले), नेकपा (माओवादी केन्द्र) र जनता समाजवादी पार्टी (जसपा)को भागमा परेका राजदूत नियुक्तिका लागि सिफारिश गरिएको हो। राष्ट्रिय स्वतन्त्र पार्टी (रास्वपा)को भागमा परेका राजदूत नियुक्तिका लागि सिफारिश गर्न बाँकी छ।
सरकारले गरेको सिफारिशका आधारमा राष्ट्रपतिले राजदूत नियुक्त गर्ने व्यवस्था छ। त्यसअघि सिफारिश गरिएका व्यक्तिमाथि संसदीय सुनुवाइ हुनेछ।
दक्षिण कोरियाका लागि राजदूत सिफारिश भएका मानव अधिकारकर्मी सुशील प्याकुरेलले उक्त पद अस्वीकार गरेका छन्।
मन्त्रिपरिषद्को असार ७ गते बसेको बैठकले उनलाई राजदूतमा सिफारिश गरेको थियो। प्याकुरेलले नाम फिर्ता लिन अनुरोध गरिएको पत्र आइतबार प्रधानमन्त्रीको सचिवालयमा दर्ता गराएका छन्।
नाम सिफारिश गर्नुअघि परराष्ट्र मन्त्रालय र मन्त्रिपरिषद्को सचिवालयबाट आफूलाई कुनै सम्पर्क वा संकेत नगरिएको उनले विज्ञप्तिमा उल्लेख गरेका छन्।
राजदूत नियुक्ति सम्बन्धमा विगतमा सरकारले तय गरेको मापदण्ड र संसदीय सुनुवाइको औचित्य र राजदूतको कार्यकालका विषयमा समेत विमर्श आवश्यक रहेको उनले उल्लेख गरेका छन्।
