दोहा । अप्रिल तेस्रो साता कतारका अमिर शेख तमिम बिन हमाद अल थानीले नेपालको भ्रमण गर्ने निस्चित भएको छ । त्यस क्रममा नेपालले कतारलाई दुई वटा हात्तीका छावा दिने भएको अधिकारीहरूले जनाएका छन्। केही वर्षअघि नेपालले कतारलाई नेपालमा पाइने एक प्रकारको बाज उपहार दिने प्रस्ताव गरेको थियो।
त्यस बेला कतारी राजदरबारले त्यसलाई स्वीकार गरे पनि नेपालमै मन्त्रालयहरूबीच समन्वय नहुँदा उक्त योजना असफल भएको अधिकारीहरू बताउँछन्।
यसपालि भने नेपालले कतारी चिडियाखानाका लागि दुईवटा छावा उपहार दिन लागेको बुझिएको छ। राष्ट्रिय निकुञ्ज तथा वन्यजन्तु संरक्षण विभागका प्रवक्ता वेदकुमार ढकालले भने, “हामीले चितवनको प्रजनन केन्द्रबाट दुईवटा हात्तीका छावा दिने तयारी गरेका छौँ। ती हात्ती जङ्गली होइनन्।”
“यसबारे हामीले परराष्ट्र मन्त्रालयलाई जानकारी गराइसकेका छौँ। सायद वन्यजन्तु आदानप्रदानबारे पनि एउटा समझदारी हुन्छ होला।”
कतारका अमिरको नेपाल भ्रमणले दुई देशबीचको निकटता बढाउने कतिपय विज्ञहरूको बुझाइ छ।
त्यस्तैमध्येका एक कतारका लागि नेपाली पूर्व राजदूत नारद भारद्वाज भन्छन्, “कतार र नेपालबीच श्रम कूटनीतिका कारण एकदमै निकट सम्बन्ध भएको छ त्यसलाई यसले थप उचाइमा लैजान मद्दत गर्छ।”
यद्यपि उनी कतारीहरूको प्राथमिकता लगानीमा केन्द्रित रहेको आफूले बुझेको बताए।
“उनीहरू विकास सहायतामा भन्दा पनि बढी लगानीमा केन्द्रित भएको देखिन्छ। तर नेपालको अस्थिर नीतिका कारण हामीले लगानी गर्न सकेनौँ भन्ने उनीहरूको गुनासो छ।”
नेपालको जलविद्युत्मा कतारी चासो भए पनि यहाँ लगानी गरेको बिजुली निर्यातका लागि भरपर्दो मापदण्ड नभएसम्म त्यो सम्भव नहुने भारद्वाजको भनाइ छ।
