काठमाण्डाै – नेपाल र जर्मनीबीच श्रम समझदारी भएको छ। जर्मनीका नागरिकसरह सेवा सुुविधा पाउने गरी नेपालबाट प्रशिक्षार्थी श्रमिक लैजाने विषयमा नेपाल र जर्मनी सरकारबीच द्विपक्षीय श्रम समझदारीमा मंगलबार हस्ताक्षर भएको हो ।
जर्मनीमा भएको औपचारिक कार्यक्रममा नेपाल सरकारका तर्फबाट श्रम, रोजगार तथा सामाजिक सुुरक्षामन्त्री शरतसिंह भण्डारी र जर्मनी सरकारको तर्फबाट त्यहाँको मानव संसाधन मन्त्रालयका उच्च प्रतिनिधिबीच नेपालबाट शून्य लागतमा प्रशिक्षार्थी श्रमिक लैजाने विषयको समझदारीपत्रमा हस्ताक्षर भएको हो ।
श्रम समझदारी अनुसार जर्मनी जान जर्मन सरकारले माग गरे अनुसार प्रशिक्षार्थी कामदार अनलाइन प्रणालीबाट आवेदन दिएर एकवर्षे प्रशिक्षार्थीका रूपमा जर्मनी जान सक्ने छन् ।
जर्मनीमा जाने प्रशिक्षार्थी श्रमिकले आफ्नो रुचि र क्षमता अनुसार सिप सिकेर पास भएपछि मात्रै सम्बन्धित क्षेत्रमा काम गर्न सक्ने समझदारीपत्रमा उल्लेख छ । समझदारी अनुसार जर्मनी जानका लागि विशेष क्षेत्र नतोकिएको र आवश्यकताका आधारमा आवेदन माग गरेर सबै क्षेत्रमा पठाउनलाई खुुला गरिएको छ ।
जर्मनी स्थित नेपाली दुतावासका नीयोग उपप्रमुख सागरप्रसाद फुयालका अनुसार जर्मनीको आन्तरिक श्रम कानुनले श्रमिकलाई दिएको अधिकार विश्वमै उदाहरणीय भएको र त्यहाँका नागरिकसरह नेपालसहित आप्रवासी श्रमिकले सेवा सुुविधा पाउने व्यवस्था छ ।
जर्मनी सरकारसँग भएको श्रम समझदारी अनुसार सरकारीस्तरबाट आवेदन माग गरेर पठाइने छ । समझदारीसँगै जर्मनीमा नेपाली श्रमिक जानका लागि बाटो खुुले पनि कार्यान्वयनमा लैजान नेपाल सरकारको तर्फबाट थप तयारी गर्नुुपर्ने श्रम मन्त्रालयका सहसचिव राजीव पोखरेलले बताए ।
जर्मनीमा रहेको नेपाली दूतावासका अनुसार अहिले जर्मनीमा झण्डै आठ हजार नेपाली बसोबास गर्दै आएका छन् । तीमध्ये धेरैजसो उच्च शिक्षा अध्ययनका लागि पुगेर पछि त्यहीँ काम गर्न थालेका छन् । पछिल्लो समय नेपाल बाट सिधै वा दोस्रो मुलुक हुँदै युरोपेली देशमा जाने नेपालीको सख्या बढ्दै गएपछि सरकारले त्यसलाई थप ब्यबस्थित गर्न भन्दै सम्बन्धित देशहरुसँग श्रम सम्झौता गर्न सुरु गरेको छ ।
नेपालले गएको शुक्रवार मात्र रोमानिया सँग श्रम सम्झौता गरेको थियो ।
