काठमाण्डौँ । खाडी र मलेसियाबाट पछिल्लो समयमा नेपाली युवाहरु युरोपियन मुलुकतर्फ मोडिन थालेका छन् । राम्रो सेवा सुविधा तथा भविष्यमा परिवार सहित ती मुलुकमा नै स्थायी रुपमा बस्न पाईने भएपछि नेपाली युवाहरुको युरोप प्रतिको मोह बढ्न थालेको हो ।
नेपाली युवाहरुको युरोप सपनाको फाईदा उठाउँदै म्यानपावर व्यवसायी तथा दलालहरुले ठगी गर्न थालेका छन् । युरोपको विभिन्न मुलुकमा पठाईदिने, आकर्षण तलब तथा सेवा सुविधा पाईने जनाउदै युवाहरुबाट दलालहरुले चर्को रकम असुल्ने गरेका हुन् । रकम लिएपछि दलालहरु सम्पर्कविहिन हुने गरेपछि युवाहरु थप पिडामा परेका छन् ।
अवैध रुपमा लुक्दै जानु पर्ने हुदाँ युवाहरु विभिन्न मुलुकहरुमा प्रहरी फन्दा पर्ने तथा विभिन्न दुर्घटनाको शिकार हुनु परेको छ ।
युरोप सपनाकै कारण १४ जना युवाहरु काठमाडौको त्रिपुरेश्वरस्थित मुन हयुमन रिर्सोसस म्यानपावर कम्पनीबाट ठगिएका छन् । सो कम्पनीले नेदरल्याण्ड ,क्रोसिया र माल्टा लगायतका मुलुकमा रोजगारीका लागि लैजाने भन्दै १४ जना बाट ठूलो रकम असुल्यो । कम्पनीले रकम असुलेपछि उनीहरुलाई गन्तब्य मुलुकमा पठाएन ।
वैदेशीक रोजगार विभागमा उजुरी
रकम भुक्तानी गरेको धेरै दिनसम्म म्यानपावर कम्पनीले गन्तब्य मुलुक नपठाएपछि उनीहरुले ठगिएको चाल पाए । वैदेशिक रोजगार विभागमा आफु ठगिएको जनाउदै युवाहरुले उजुरी दिएको विभागले जनाएको छ ।
उजुरीको आधारमा छानबिन गर्दा मुन हयुमन रिर्सोस कम्पनीले युवाहरुबाट करिब डेढ करोड रकम ठगी गरेको पाईएको विभागले जनाएको छ । उजुरीको आधारमा अनुसन्धान गर्दा कम्फनीका सञ्चालक तथा अन्य व्यक्तिले आकर्षण तलब सुविधा सहित नेदरल्याण्ड, त्रोसिया र माल्टा लगिदिने भन्दै रकम ठगी गरेको पाईएको वैदेशिक रोजगार विभागले जनाएको छ ।
रकम ठगी गर्ने मुन हयुमन रिसोर्सका सञ्चालकहरु प्रकाश राई, दिपक श्रेष्ठ, सुवास थापा विरुद्ध वैदेशिक रोजगार ऐन दफा ४४ बमोजिम बैदेशिक रोजगार न्यायाधिकरणमा मुद्धा दायर गरेको छ । त्यस्तै, राजेन्द्र श्रेष्ठललाई विरुद्ध वैदेशिक रोजगार ऐनको दफा ४३ बमोजिम मुद्धा दायर गरिएको छ ।
विभागले कम्पनीका सञ्चालकहरुले ठगी गरेको एक करोड ४४ लाख रुपैयाँ ३२ हजार रुपैयाँ र सो रकमको ५० प्रतिशतले हुन आउने हर्जाना क्षतिपूर्ति बापत ७२ लाख १६ हजार सहित दुई करोड १६ लाखको माग दाबी गरेको छ ।
