काठमाण्डौ। गैरआवासीय नेपाली संघ मलेसियाले आगामी ११ औ महाधिवेशनका लागि प्रतिनिधि नामावलीमा बदमासी गरेको छ । संघले अन्तराष्ट्रिय समन्वय समितिमा प्रतिनिधिको नामावली पठाउँदा त्रुटी गरेको हो । संघले वास्तविक प्रतिनिधि नामावली नै छुटाएपछि संघको बदमासी खुलेको हो ।
संघले केन्द्रमा प्रतिनिधिको नामावली छुटाएपछि यसको विरोध भएको थियो । विरोध पछि संघले केन्द्रमा नामावली सुची सञ्चाउन अनुरोध गरेको पनि थियो । तर, केन्द्रले नामावली सच्चाउन नसक्ने जनाएको संघका महासचिव टिकाराम अधिकारीले बताए ।
संघले मंगलबार एक प्रेस विज्ञप्ती जारी गर्दै प्रतिनिधि नामावलीमा पठाउँदा गल्ती भएको समेत स्वीकार गरेको छ । यद्यपी केन्द्रलाई सच्चाउन अनुरोध गरिएको तर, केन्द्रले निर्वाचन कमिटिले मात्रै निर्णय गर्न सक्ने जवाफ दिएको विज्ञप्तीमा उल्लेख गरेको छ ।
संघले विज्ञप्तीमा सामाजिक सञ्जालमा संघको बिषयमा भएको टिकाटिप्पणीको प्रति ध्यानकर्षण भएको जनाएको छ । आफैले गल्ती गरेको अवस्थामा पनि संघको ठाडो विज्ञप्तीले संघको प्रवृति स्पष्ट पारेको मलेसियाकै प्रतिनिधिहरुको गुनासो छ ।
महाधिवेशनका प्रतिनिधिको नामावलीको बिषयमा भएको चलखेल घटना भने नौलौ होइन । नेतृत्व तहमा बसेकाहरुले आफखुशी प्रतिनिधि चयन गर्ने प्रचलन पुरानै हो । जसबाट मलेसिया पनि अछुतो रहन सकेको छैन ।
मलेसियाबाट १७१ जना प्रतिनिधि छन् । तर, संघले आठ जना प्रतिनिधिको नाम केन्द्रमा पठाएन । गैर आवासीय नेपालीसंघ मलेसियामा अहिले दुई जना अध्यक्ष छन् । विनोद श्रेष्ठ र आरके महत्तो । विनोद श्रेष्ठले यस अघि एक कार्यकाल पुरा गरि सकेका छन् ।
